التنبيهات

الأنواع

البوت ← التنبيهات. لكل نوع تبويب ورابط OBS خاص فيه، وشكله ومكانه وصوته. البتس والمداهمة من تويتش بس، والكيكس من كيك بس، واستبدال النقاط من الثنتين.

كل منصة لحالها

تحت «هذا التنبيه شغال» فيه «يطلع من»: كيك وتويتش. مثلا تطفي المتابعة من كيك وتخليها من تويتش، وتخلي الاشتراك من كيك وتطفيه من تويتش. ومن «المنصات» تحت تطفي كل تنبيهات منصة مرة وحدة. البوت وشكر الاشتراك في الشات يكملون في الحالتين.

الترتيب

«صورة فوق» و«جنب» و«نص بس» مربع تحطه وين ما تبي وتكبره وتصغره من المعاينة، و«الحجم» يكبر التنبيه كله. و«عرض الصورة» و«ارتفاع الصورة» تحت الميديا يغيرون الصورة أو الفيديو بس، والخط يبقى على حجمه. و«كاملة» تبين الصورة كلها، و«تعبي المكان» تعبي المساحة وتقص الزايد بدون ما تمط الصورة. و«خلفية» تخلي الصورة أو الفيديو يغطي الشاشة كاملة والنص في النص، فما لها مكان ولا حجم.

النص والمتغيرات

{name} الاسم، {count} العدد (الشهور في الاشتراك، والسعر في الاستبدال)، {reward} اسم الجائزة، {gift} اسم هدية الكيكس.

رسالة الداعم

لما المشترك يجدد ويكتب رسالة، أو أحد يرسل بتس أو كيكس مع رسالة، أو يكتب شي مع الاستبدال، تطلع رسالته تحت الاسم بخط أصغر. الروابط تنشال، وإذا فيها كلمة من الكلمات الممنوعة ما تطلع أبد. تقدر تطفيها لكل نوع.

تنويعات حسب العدد والمنصة

من «خيارات أكثر» تحت التنبيه ← «تنويع جديد». مثلا اشتراك ١٢ شهر أو أكثر يطلع بشكل ثاني: نص وصورة وصوت خاصة فيه، ومن «المدة والشكل والألوان» مدته ودخوله وترتيبه وحركة النص وحجم الخط والألوان ومستوى الصوت. أي شي ما تغيره يبقى مثل التنبيه الأساسي.

ولكل تنويع تختار المنصة: كل المنصات، أو كيك بس، أو تويتش بس. كذا المتابعة من كيك تطلع بشكل ومن تويتش بشكل ثاني، بنفس رابط OBS. إذا انطبق أكثر من تنويع، يشتغل الأعلى عدد، واللي على منصة يسبق اللي على الكل.

جربه من «جرب تنبيه»: حط العدد، واختار «كأنه جاي من» كيك أو تويتش.

الهدايا الكثيرة

إذا أحد أهدى كذا اشتراك ورا بعض، يطلع له تنبيه واحد بالعدد كله، وشكر واحد في الشات. التنبيه ينتظر ثواني قليلة عشان يجمعها.

جرب تنبيه

الزر فوق يفتح خانات للاسم والعدد واسم الجائزة والرسالة، عشان تشوف مثلا شكل اشتراك ٢٤ شهر قبل لا يصير.

الوقف المؤقت

من فوق في صفحة التنبيهات، أو من زر «وقف التنبيهات» في لوحة سجل الأحداث داخل OBS. وهي موقفة، التنبيهات تنتظر (لين ٤ ساعات) وتطلع بالترتيب أول ما ترجعها. التجربة تطلع عادي.

استبدال النقاط في تويتش